തിരുവനന്തപുരം: 'അക്ഷരം ആരോഗ്യം' സമഗ്ര സ്കൂൾ ആരോഗ്യ പദ്ധതിയുടെ സംസ്ഥാനതല ഉദ്ഘാടനം തിരുവനന്തപുരത്ത് ആരോഗ്യ വകുപ്പ് മന്ത്രി വീണാ ജോർജ് നിർവ്വഹിച്ചു. കേരളത്തിലെ യുവതലമുറയുടെ സമഗ്രമായ ആരോഗ്യ സംരക്ഷണം ഉറപ്പാക്കുക എന്ന ലക്ഷ്യത്തോടെ ആരോഗ്യ വകുപ്പിന്റെ നേതൃത്വത്തില് വിദ്യാഭ്യാസ വകുപ്പിന്റെ സഹകരണത്തോടെ നടപ്പാക്കുന്ന സമഗ്ര സ്കൂള് ആരോഗ്യ പരിപാടിയാണ് അക്ഷരം ആരോഗ്യം.
സംസ്ഥാനത്തെ എല്ലാ സര്ക്കാര്, എയ്ഡഡ് സ്കൂളുകളിലും ഒന്നു മുതല് 12 വരെ ക്ലാസുകളില് പഠിക്കുന്ന കുട്ടികളെ ഗുണഭോക്താക്കളായി ഉള്പ്പെടുത്തിയാണ് പദ്ധതി നടപ്പാക്കുക. ആരോഗ്യ അവബോധവും മികച്ച ആരോഗ്യ ശീലങ്ങളും കുട്ടികളിലൂടെ കുടുംബങ്ങളിലേക്കും അതുവഴി സമൂഹത്തിലേക്കും എത്തിക്കുകയാണ് ലക്ഷ്യം. അക്ഷരം ആരോഗ്യം പരിപാടി വഴി പരിശോധന നടത്തി കുട്ടികള്ക്ക് ഹെല്ത്ത് കാര്ഡ് നല്കും. ഹെല്ത്ത് കാര്ഡില് കുട്ടിയുടെ ആരോഗ്യ വിവരങ്ങള് രേഖപ്പെടുത്തും. ഈ കാര്ഡ് തുടര്ന്ന് ഇലക്ട്രോണിക്ക് ഹെല്ത്ത് കാര്ഡ് ആയി മാറ്റുകയും പൂര്ണ സ്വകാര്യതയോടെയും സുരക്ഷിതത്തോടെയും കൂടി സ്റ്റേറ്റ് ഡേറ്റാ സെന്ററില് സൂക്ഷിക്കുകയും ചെയ്യും. അടിയന്തര ഘട്ടത്തില് ഈ ഇലക്ട്രോണിക് രേഖ കുട്ടിക്ക് വളരെ സഹായകമായിത്തീരും. എല്ലാ സ്കൂളുകളിലും ഹെല്ത്ത് അസംബ്ലി, ഹെല്ത്ത് കോര്ണര് ഉണ്ടായിരിക്കും, ഇതിലൂടെ ആരോഗ്യകരമായ ജീവിതശൈലി പ്രോത്സാഹിപ്പിക്കുകയും അനാരോഗ്യകരമായ ശീലങ്ങള് തടയുകയും ചെയ്യുന്നു. ഓരോ സ്കൂളിലും ഹെല്ത്ത് മെന്റര്മാരായി അധ്യാപകരെ തിരഞ്ഞെടുക്കുകയും അവര്ക്ക് വിദ്യാഭ്യാസ വകുപ്പുമായി ചേര്ന്ന് തയ്യറാക്കിയ മോഡ്യൂള് പ്രകാരം പരിശീലനം നല്കുന്നതാണ്. ഈ അധ്യാപകര് കൃത്യമായ ഇടവേളകളില് തുടര്ച്ചയായി നാലു മേഖലകള് അടങ്ങുന്ന 11 തീമുകളില് കുട്ടികള്ക്ക് ആരോഗ്യ വിദ്യാഭ്യാസം നല്കുന്നതാണ്. ഇതിന് വേണ്ട സമയവും സൗകര്യവും മുതലായവ സ്കൂള് അധികൃതര് കണ്ടെത്തും. ആരോഗ്യ വിദ്യാഭ്യാസം പ്രായാധിഷ്ഠിതമായ രീതിയിലായിരിക്കും നല്കുന്നത്. ആരോഗ്യത്തിന്റെ വിവിധ ഘട്ടങ്ങളെക്കുറിച്ച് വിദ്യാര്ത്ഥികള്ക്ക് ശാസ്ത്രീയമായ അറിവ് ജിജ്ഞാസ പങ്കാളിത്തം എന്നിവ സൃഷ്ടിക്കാനാകും. ഈ അവബോധം കുട്ടികളില് നിന്ന് കുടുംബങ്ങളിലേക്കും അവിടെ നിന്ന് സമൂഹത്തിലേക്കും പകര്ന്നു നല്കാനാകും. അക്ഷരം ആരോഗ്യം പരിപാടിയില് വിദ്യാര്ത്ഥികളുടെ സജീവ പങ്കാളിത്തം നല്കുന്നതിന് വേണ്ടി ഹെല്ത്ത് അമ്പാസഡര്മാരായി എല്ലാ ക്ലാസില് നിന്നും ഒന്നോ രണ്ടോ കുട്ടികളെ തിരഞ്ഞെടുക്കും. ഇവരിലൂടെ അധ്യാപകര് നല്കുന്ന വിവരങ്ങള് കൂടുതല് സൗഹാര്ദ്ദപരമായി വിദ്യാര്ത്ഥികളുടെ ഇടയില് പ്രചരിപ്പിക്കും. അയണ് ഫോളിക് ആസിഡ് ഗുളിക, കൗമാരാരോഗ്യ പരിപാടി, പ്രതിരോധ കുത്തിവെയ്പ്പുകള്, ആര്ത്തവ ശുചിത്വ പരിപാടി തുടങ്ങിയ സ്കൂളുകളില് നടക്കുന്ന ആരോഗ്യ പരിപാടികളേയും പദ്ധതികളേയും അക്ഷരം ആരോഗ്യം കൂടുതല് ശക്തീകരിക്കും. മാത്രവുമല്ല അടിയന്തിര ഘട്ടങ്ങളില് ഒട്ടും താമസം വരാതെ ശാസ്ത്രീയമായ രീതിയില് പ്രഥമ ശുശ്രൂഷ സ്കൂളില്വച്ചോ വഴിയില്വച്ചോ വീട്ടില്വച്ചോ ഉണ്ടാകുകയാണെങ്കില് ആ നേരത്ത് പ്രാഥമിക രക്ഷാ സഹായം നല്കുന്നതിന് വിദ്യാര്ത്ഥികളേയും അധ്യാപകരേയും അക്ഷരം ആരോഗ്യം പദ്ധതി ഘട്ടംഘട്ടമായി പരിശീലിപ്പിക്കുന്നതായിരിക്കും. ആരോഗ്യ പ്രശ്നങ്ങള് നേരത്തെകൂട്ടി കണ്ടെത്തുന്നതിലൂടെ സുഗമമായി പരിഹരിക്കാനാകും. ഇതുവഴി മാനസിക ആക്കാദമിക ശാരീരിക മികവിലേക്കും നേരിട്ട് അക്ഷരം ആരോഗ്യം പദ്ധതികള്ക്ക് പങ്കുവഹിക്കാനാകും. പദ്ധതിയുടെ സംസ്ഥാനതല ഉദ്ഘാടനം ഫെബ്രുവരി 6ന് രാവിലെ 11 മണിക്ക് കോട്ടണ്ഹില് ഗവ. ഹയര്സെക്കന്ററി സ്കൂളില് വച്ച് ആരോഗ്യ വകുപ്പ് മന്ത്രി വീണാ ജോര്ജ് നിര്വഹിച്ചു. വിദ്യാഭ്യാസ വകുപ്പ് മന്ത്രി വി ശിവന്കുട്ടി അധ്യക്ഷത വഹിച്ചു.
