Kottayam LIVE is one of the emerging online news portal concentrating instant delivery of news from kottayam.
ചങ്ങനാശ്ശേരി: ചങ്ങനാശ്ശേരിയുടെ വികസന പ്രവർത്തനങ്ങൾക്കും പരാതി പരിഹാരങ്ങൾക്കും ഇനി ഡിജിറ്റൽ വേഗം. ജനങ്ങളും ജനപ്രതിനിധിയും തമ്മിലുള്ള ആശയവിനിമയം കൂടുതൽ ലളിതവും വേഗതയേറിയതും കാര്യക്ഷമവുമാക്കുക എന്ന ലക്ഷ്യത്തോടെ മൊബൈൽ ആപ്പ് അവതരിപ്പിച്ചു വിനു ജോബ് എംഎൽഎ.
KL 33 MLA Connect മൊബൈൽ ആപ്പ് മുഖ്യമന്ത്രി വി.ഡി. സതീശൻ ഉദ്ഘാടനം ചെയ്തു. ചങ്ങനാശ്ശേരി മണ്ഡലത്തിലെ ഓരോ ജനങ്ങൾക്കും അവരുടെ ജനപ്രതിനിധിയുമായും എംഎൽഎ ഓഫീസുമായും കൂടുതൽ എളുപ്പത്തിൽ ബന്ധപ്പെടാൻ കഴിയുന്ന ഒരു ഡിജിറ്റൽ വേദിയാണ് KL 33 MLA Connect. ഈ ആപ്പിലൂടെ മണ്ഡലത്തിലെ വികസന പ്രവർത്തനങ്ങളും പ്രധാന അറിയിപ്പുകളും അറിയാം.
സർക്കാർ ക്ഷേമപദ്ധതികളും ജനോപകാരപ്രദമായ വാർത്തകളും ലഭിക്കും. നിങ്ങളുടെ പ്രദേശത്തെ പ്രശ്നങ്ങളും പരാതികളും എംഎൽഎ യെ നേരിട്ട് അറിയിക്കാം. വിവിധ ആവശ്യങ്ങളും നിർദേശങ്ങളും എം.എൽ.എ ഓഫീസിന്റെ ശ്രദ്ധയിൽപ്പെടുത്താം. മലയാളം, ഇംഗ്ലീഷ് എന്നീ രണ്ട് ഭാഷകളിൽ ആപ്പ് ഉപയോഗിക്കാം.
പരാതികൾ സമർപ്പിക്കാൻ മൊബൈൽ നമ്പർ ഉപയോഗിച്ച് ലോഗിൻ ചെയ്ത് ലഭിക്കുന്ന ഓടിപി നൽകി സ്ഥിരീകരണം പൂർത്തിയാക്കിയ ശേഷം പരാതി സമർപ്പിക്കാം. ജനങ്ങളുടെ ഓരോ പരാതിക്കും ആവശ്യത്തിനും ശബ്ദമാകുന്ന ജനങ്ങളിലേക്ക് കൂടുതൽ വേഗത്തിൽ എത്തിച്ചേരുന്ന ഒരു സംവിധാനമാണ് ഇതിലൂടെ ലക്ഷ്യമിടുന്നത് എന്നും സാങ്കേതികവിദ്യയെ ജനസേവനത്തിനായി പ്രയോജനപ്പെടുത്തി ജനങ്ങളും ജനപ്രതിനിധിയും തമ്മിലുള്ള അകലം കുറയ്ക്കാനുള്ള ശ്രമമാണിത് എന്നും എംഎൽഎ വിനു ജോബ് പറഞ്ഞു.
എംഎൽഎ യുടെ മകൾ ശ്രദ്ധ, എബൽ, റിനോയ് മാത്യു,ആന്റണി ജോൺ മാത്യു എന്നിവർ ഉൾപ്പെട്ട സംഘമാണ് ആപ്പ്ലിക്കേഷൻ വികസിപ്പിച്ചത്.
