Kottayam LIVE is one of the emerging online news portal concentrating instant delivery of news from kottayam.
എരുമേലി: മാനവ മതമൈത്രിയുടെ ലോകോത്തര മാതൃകയാണ് എരുമേലിയെന്നു അഡീഷണൽ ഡിജിപി പി. വിജയൻ. മണ്ഡല-മകരവിളക്ക് തീർത്ഥാടനവുമായി ബന്ധപ്പെട്ടു എരുമേലിയിലെ മുന്നൊരുക്കങ്ങൾ വിലയിരുത്തുന്നതിനായി എരുമേലിയിൽ എത്തിയതായിരുന്നു അദ്ദേഹം.
എരുമേലിയിൽ എത്തിയ അദ്ദേഹം വാവർ പള്ളിയും ശ്രീ ധർമ്മ ശാസ്താ ക്ഷേത്രവും സന്ദർശിച്ചു. വാവർ പള്ളിയിലെത്തിയ അഡീഷണൽ ഡിജിപിയെ എരുമേലി മഹല്ല് ജമാഅത്ത് പ്രസിഡന്റ് നാസർ പനച്ചിയുടെ നേതൃത്വത്തിൽ ഷാൾ അണിയിച്ച് സ്വീകരിച്ചു. ജമാഅത്ത് സെക്രട്ടറി മിഥുലാജ് പുത്തൻവീട്, നൗഷാദ് കുറുങ്കാട്ടിൽ, നിഷാദ് താന്നിമൂട്ടിൽ, നാസർ ചക്കാല, മുഹമ്മദ് ഷഹനാസ് തുടങ്ങിയവർ സ്വീകരണത്തിന് നേതൃത്വം നൽകി.
ശ്രീ ധർമ്മ ശാസ്താ ക്ഷേത്രത്തിൽ ദേവസ്വം ബോർഡ് അഡ്മിനിസ്ട്രേറ്റിവ് ഓഫീസറുടെയും ഉദ്യോഗസ്ഥരുടെയും നേതൃത്വത്തിൽ സ്വീകരിച്ചു. പോലീസ് സ്റ്റേഷനിൽ നടന്ന യോഗത്തിൽ ജില്ലയിലെ പോലീസ് ഉദ്യോഗസ്ഥർ പങ്കെടുത്തു. മണ്ഡല-മകരവിളക്ക് തീർത്ഥാടനകാലം സുഗമമായും സുരക്ഷിതമായും നടത്തുന്നതിന് ആവശ്യമായ നിർദ്ദേശങ്ങൾ അദ്ദേഹം നൽകി. കോട്ടയം ജില്ലയിൽ പോലീസ് വിപുലമായ ക്രമീകരണങ്ങളാണ് ഒരുക്കിയിരിക്കുന്നതെന്ന് അദ്ദേഹം പറഞ്ഞു.
ഗതാഗതക്കുരുക്ക് ഒഴിവാക്കുക, വാഹനാപകടങ്ങൾ കുറയ്ക്കുക, എരുമേലിയിൽ എത്തുന്ന എല്ലാ തീർത്ഥാടകർക്കും ആവശ്യമായ സൗകര്യങ്ങൾ ഒരുക്കുക തുടങ്ങി നിരവധിയായ പ്രവർത്തനങ്ങളാണ് നടപ്പിലാക്കുന്നത്. ഇടത്താവളങ്ങളിലും പഴുതടച്ച സുരക്ഷയൊരുക്കിയിട്ടുള്ളതായി അദ്ദേഹം പറഞ്ഞു. പ്രവേശന വഴികള്‍, ആരാധനാലയങ്ങള്‍, പാര്‍ക്കിംഗ് ഗ്രൗണ്ടുകള്‍, ടൗണ്‍ പരിസരങ്ങള്‍ എന്നിവയെല്ലാം 24 മണിക്കൂറും പോലീസിന്റെ കാമറ നിരീക്ഷണത്തിലായിരിക്കും.
ഇതിനായി 50 ഹൈടെക് നിരീക്ഷണ കാമറകള്‍ സ്ഥാപിച്ചിട്ടുണ്ട്, 530 പോലീസുകാരെയും നിയോഗിച്ചിട്ടുണ്ട്. ജനുവരി 20 വരെ ആറ് ഘട്ടങ്ങളിലായാണ് പോലീസ് സേനയെ വിന്യസിക്കുന്നത്. മകരവിളക്ക്, ചന്ദനക്കുടം, പേട്ടതുള്ളല്‍ ദിവസങ്ങളില്‍ സേനാംഗങ്ങളുടെ എണ്ണം ഇരട്ടിയാക്കും. നൂറിലധികം സ്‌പെഷ്യല്‍ പോലീസിനെക്കൂടി നിയമിക്കുന്നുണ്ട്. ജില്ലാ പോലീസ് മേധാവി സാബു മാത്യുവിന്റെ നേരിട്ടുള്ള നിയന്ത്രണത്തിലാണ് സുരക്ഷാ ക്രമീകരണങ്ങള്‍.
കാഞ്ഞിരപ്പള്ളി ഡിവൈഎസ്പിക്കാണ് മേല്‍നോട്ടചുമതല. നിരീക്ഷണ വിഭാഗത്തിന് നേതൃത്വം നല്‍കാന്‍ മറ്റൊരു ഡിവൈഎസ്പിയും ഉണ്ടാകും. 3 സര്‍ക്കിള്‍ ഇന്‍സ്‌പെക്ടര്‍മാര്‍, 55 എസ്.ഐ/എ.എസ്.ഐമാര്‍, 302 സീനിയര്‍ സി.പി.ഒമാര്‍, 168 സി.പി.ഒമാര്‍ എന്നിവര്‍ മൂന്ന് ഷിഫ്റ്റുകളിലായി ഡ്യൂട്ടിയിലുണ്ടാകും. എരുമേലിയിൽ അമ്പലത്തിനു എതിർവശം 24 മണിക്കൂറും പ്രവർത്തിക്കുന്ന പോലീസ് കൺട്രോൾ റൂം പ്രവർത്തിക്കും.
