പാലാ: സിപിഐഎം വിപുലീകൃത കോട്ടയം ജില്ലാ കമ്മിറ്റി യോഗം ഇന്നും നാളെയുമായി പാലായിൽ നടക്കും. കോഴിക്കോട് നടന്ന സിപിഐഎം വിപുലീകൃത സംസ്ഥാന കമ്മിറ്റി യോഗത്തിലെ തീരുമാനത്തിൻ്റെ ഭാഗമായിട്ടാണ് കോട്ടയത്ത് വിപുലീകൃത ജില്ലാ കമ്മിറ്റി യോഗം ചേരുന്നത്.
പാല സൺസ്റ്റാർ ഓഡിറ്റോറിയത്തിലെ എ വി റസൽ നഗറിൽ ചേരുന്ന യോഗം പൊളിറ്റ് ബ്യൂറോ അംഗം എ വിജയരാഘവൻ ഉദ്‌ഘാടനം ചെയ്യും. യോഗത്തിൽ ജില്ലാ സെക്രട്ടറി ടി ആർ രഘുനാഥൻ റിപ്പോർട്ട്‌ അവതരിപ്പിക്കും. റിപ്പോർട്ടിനെ അടിസ്ഥാനമാക്കിയുള്ള ചർച്ചകൾ രണ്ടുദിവസങ്ങളിലായി നടക്കും.
ജില്ലയിൽ നിന്ന്‌ 100 പ്രതിനിധികളാണ്‌ വിപുലീകൃത ജില്ലാ കമ്മിറ്റി യോഗത്തിൽ പങ്കെടുക്കുക. പാർട്ടിയുടെ ഭാവി കർമ പരിപാടികൾക്ക്‌ യോഗം രൂപം നൽകും. ഡോ. തോമസ് ഐസക്, പി രാജീവ്, വി എൻ വാസവൻ, എം വി ജയരാജൻ, പി സതീദേവി, എം എം മണി, പി കെ ബിജു, സജി ചെറിയാൻ, പി ജയരാജൻ, ഡോ. ജോൺ ബ്രിട്ടാസ് എം പി ഉൾപ്പെടെയുള്ളവർ രണ്ട് ദിവസങ്ങളിലായി നടക്കുന്ന വിപുലീകൃത ജില്ലാ കമ്മിറ്റി യോഗത്തിൽ പങ്കെടുക്കും.
