കോട്ടയം: മാസ്റ്റേഴ്സ് ഗെയിംസ് അസോസിയേഷൻ ഓഫ് കേരള സംസ്ഥാനതലത്തിൽ നടത്തിയ മത്സരത്തിൽ കോട്ടയം ജില്ലയ്ക്കായി 4 സ്വർണ മെഡലുകൾ നേടി സോളമൻ തോമസും(53) ക്രിസ്റ്റി സോളമനും(47). ജനുവരി 3, 4 തീയതികളിൽ തിരുവനന്തപുരത്ത് ആണ് വെയ്റ്റ്ലിഫ്റ്റിങ് പവർലിഫ്റ്റിങ് മത്സരങ്ങൾ നടന്നത്.
കളത്തിപ്പടിയിൽ പ്രവർത്തിക്കുന്ന സോളമൻസ് ജിം ഫിറ്റ്നസ് സെൻ്റർ ആൻഡ് സ്പോർട്സ് ക്ളബിന്റെ ഉടമസ്ഥരും പ്രധാന ഫിറ്റ്നസ് പരിശീലകരുമാണ് ഇരുവരും. വെയ്റ്റ്ലിഫ്റ്റിങിൽ സോളമൻ 94 കിലോ വിഭാഗത്തിലും ക്രിസ്റ്റി 64 കിലോ വിഭാഗത്തിലുമാണ് മത്സരിച്ചത്. പവർലിഫ്റ്റിങിൽ സോളമൻ 105 കിലോ വിഭാഗത്തിലും, ക്രിസ്റ്റി 63 കിലോ വിഭാഗത്തിലും മത്സരിച്ച് ആണ് സ്വർണ്ണ മെഡലുകൾ നേടിയത്. തലസ്ഥാനത്തെ ഔദ്യോഗിക ജീവിതത്തിനിടയിൽ ജില്ലാ ശരീര സൗന്ദര്യ മത്സരത്തിൽ രണ്ട് തവണ ഒന്നാം സ്ഥാനവും സ്കൂൾ കോളേജ് പഠനകാലത്ത് ഗുസ്തിയിൽ സംസ്ഥാനതലത്തിൽ നാലു തവണ ജേതാവുമായിട്ടുള്ള സോളമൻ തോമസ് പവർലിഫ്റ്റിങിൽ പത്തോളം സംസ്ഥാനതല മത്സരങ്ങളിൽ സ്വർണ്ണ മെഡൽ ജേതാവ് ആണ്. ഗോവയിലും ഹിമാചൽപ്രദേശിലും ദേശീയതലത്തിൽ നടത്തിയ രണ്ടു പവർലിഫ്റ്റിങ് മത്സരങ്ങളിലും സ്വർണ്ണ മെഡൽ നേടിയിട്ടുണ്ട്. ഗോവയിൽ നടന്ന ദേശീയ പഞ്ചഗുസ്തി മത്സരത്തിൽ വെള്ളിമെഡലും ലഭിച്ചിട്ടുണ്ട്. ക്രിസ്റ്റി സോളമൻ ഹിമാചൽപ്രദേശിൽ ദേശീയതലത്തിൽ നടത്തിയ പവർലിഫ്റ്റിങിൽ സ്വർണ്ണ മെഡൽ ജേതാവാണ്. പവർലിഫ്റ്റിങ് അസോസിയേഷൻ ആലപ്പുഴയിൽ നടത്തിയ കേരള സ്റ്റേറ്റ് ബെഞ്ച്പ്രസ് മത്സരത്തിൽ സ്വർണ്ണ മെഡൽ നേടിയിരുന്നു. മലപ്പുറത്ത് നടന്ന കേരള സ്റ്റേറ്റ് മാസ്റ്റേഴ്സ് ഗെയിംസിൽ പവർലിഫ്റ്റിങിൽ സ്വർണ്ണ മെഡലും എറണാകുളത്ത് പവർലിഫ്റ്റിങ് അസോസിയേഷൻ കേരള സോൺ നടത്തിയ കേരള സ്റ്റേറ്റ് പവർലിഫ്റ്റിങ് മത്സരത്തിൽ സിൽവർ മെഡലും നേടിയിട്ടുണ്ട്. ഈ മാസം അവസാനം മഹാരാഷ്ട്ര പൂനെയിൽ "സൂപ്പർ മാസ്റ്റേഴ്സ് ഗെയിംസ് ആൻഡ് സ്പോർട്സ് ഫെഡറേഷൻ ഇന്ത്യ"യുടെ ആഭിമുഖ്യത്തിൽ നടക്കുന്ന ദേശീയ മത്സരത്തിൽ കേരളത്തിനായി വെയ്റ്റ്ലിഫ്റ്റിങിലും പവർലിഫ്റ്റിങിലും മത്സരിക്കാൻ യോഗ്യത നേടീയിരിക്കുകയാണ് ഇരുവരും. സോളമൻ തോമസ് മാസ്റ്റേഴ്സ് ഗെയിംസ് അസോസിയേഷൻ ഓഫ് കേരള കോട്ടയം ജില്ലാ പ്രസിഡന്റും ക്രിസ്റ്റി സോളമൻ വൈസ് പ്രസിഡന്റുമാണ്.കളത്തിപ്പടി കണ്ണംപള്ളിയിൽ പരേതനായ കെ.സി. തോമസിന്റെയും ശോശാമ്മയുടെയും മകനാണ് സോളമൻ തോമസ്. പാറയിൽ പി.ടി. ഏബ്രഹാമിന്റെയും അന്നമ്മയുടെയും മകൾ ആണ് ക്രിസ്റ്റി. മക്കൾ : സൂസൻ (അലിയാൻസ്, തിരുവനന്തപുരം). ഗബ്രിയേൽ : (എൻജിനീയറിങ് വിദ്യാർത്ഥി, അയർലൻഡ്).
