രാഷ്‌ട്രപതിയുടെ സന്ദര്‍ശനം: വ്യാഴം,വെള്ളി ദിവസങ്ങളിൽ കോട്ടയത്ത് ഗതാഗത നിയന്ത്രണം ഏർപ്പെടുത്തി, വഴിയോര കച്ചവടങ്ങൾക്കും പാർക്കിങ്ങിനും നിരോധനം, ഗതാഗത നിയന്ത്രണങ്ങൾ എങ്ങനെയെന്നറിയാം:

കോട്ടയം: രാഷ്ട്രപതി ദ്രൗപദി മുര്‍മുവിന്റെ സന്ദർശനവുമായി ബന്ധപ്പെട്ട് കോട്ടയത്ത് വ്യാഴം,വെള്ളി ഗതാഗത നിയന്ത്രണമേർപ്പടുത്തി. ഒക്ടോബർ 23 ഉച്ചയ്ക്ക് 1 മുതൽ രാത്രി 7 വരെയും, ഒക്ടോബർ 24 ൽ രാവിലെ 6 മുതൽ 11 വരെയുമാണ് ഗതാഗത നിയന്ത്രണം ഏർപ്പെടുത്തിയിരിക്കുന്നത്. രണ്ടു ദിവസങ്ങളിലും റോഡ് അരികുകളിലും ജംഗ്ഷനുകളിലും പാർക്കിങ്ങും, തട്ടുകട ഉൾപ്പടെയുള്ള വഴിയോര വാണിഭങ്ങളും, ഓട്ടോ, ടാക്സി സ്റ്റാൻഡുകളും, കർശനമായി നിരോധിച്ചിരിക്കുന്നുവെന്ന് പോലീസ് അറിയിച്ചു. മൂവാറ്റുപുഴ, കടുത്തുരുത്തി ഭാഗങ്ങളില്‍നിന്നും വരുന്ന ചങ്ങനാശ്ശേരി ഭാഗത്തേക്ക് പോകേണ്ട വാഹനങ്ങള്‍ പട്ടിത്താനം ജംഗ്ഷനില്‍ നിന്നും തിരിഞ്ഞ് ഏറ്റുമാനൂര്‍-മണര്‍കാട് ബൈപ്പാസ്, പുതുപ്പള്ളി വഴി പോകേണ്ടതാണ്. ചങ്ങനാശ്ശേരി ഭാഗത്തുനിന്നും ഏറ്റുമാനൂര്‍ ഭാഗത്തേക്ക് പോകേണ്ട വാഹനങ്ങള്‍ ചങ്ങനാശ്ശേരി ടൗണില്‍നിന്നും കുരിശുംമൂട്, തെങ്ങണ, ഞാലിയാകുഴി, പുതുപ്പള്ളി, മണര്‍കാട്-ഏറ്റുമാനൂര്‍ ബൈപ്പാസ് വഴി പോകേണ്ടതാണ്. മെഡിക്കല്‍ കോളേജ് ഭാഗത്തുനിന്നും കോട്ടയം ടൗണിലേക്ക് പോകേണ്ട പ്രൈവറ്റ് ബസുകള്‍ വട്ടമൂട് പാലം കയറി തിരുവഞ്ചൂർ വഴി പോകേണ്ടതാണ്. തിരുവഞ്ചൂർ മുതൽ വട്ടമൂട് വരെയുള്ള ഭാഗം വൺ വേ ആയിരിക്കും. ചിങ്ങവനം ഭാഗത്തുനിന്നും കോട്ടയം ടൗണിലേക്ക് പോകേണ്ട വാഹനങ്ങള്‍ മാവിളങ്ങ് ജംക്ഷനില്‍ നിന്നും തിരിഞ്ഞ് പാക്കില്‍, പൂവന്‍തുരുത്ത്, കടുവാക്കുളം, നാല്‍ക്കവല വഴി പുതുപ്പള്ളിയെത്തി പോകേണ്ടതാണ്. ചങ്ങനാശ്ശേരി ഭാഗത്തുനിന്നും കോട്ടയത്തേക്ക് വരുന്ന KSRTC ബസുകള്‍ പുളിമൂട് ജംക്ഷനില്‍നിന്നും തിരിഞ്ഞ് KSRTC സ്റ്റാന്റിലേക്ക് പോകാവുന്നതാണ്. പൊന്‍കുന്നം, കാഞ്ഞിരപ്പള്ളി, മുണ്ടക്കയം ഭാഗങ്ങളിലേക്ക് പോകേണ്ട KSRTC ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംഗ്ഷനിലെത്തി അവിടെനിന്നും KK റോഡ് കളക്റ്ററേറ്റ് ജംഗ്ഷന്‍, കഞ്ഞിക്കുഴി, മണര്‍കാട് വഴി പോകേണ്ടതാണ്. എറണാകുളം, തൃശൂര്‍ ഭാഗങ്ങളിലേക്ക് പോകേണ്ട KSRTC ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംക്ഷനിലെത്തി അവിടെനിന്നും KK റോഡിൽ കളക്റ്ററേറ്റ് ജംഗ്ഷന്‍, കഞ്ഞിക്കുഴി, മണര്‍കാട്, ഏറ്റുമാനൂര്‍ വഴി പോകേണ്ടതാണ്. ആലപ്പുഴ, ചേര്‍ത്തല ഭാഗങ്ങളില്‍നിന്നും കോട്ടയം ടൗണിലേക്ക് പോകേണ്ട വാഹനങ്ങള്‍ ബണ്ട് റോഡില്‍നിന്നും തിരിഞ്ഞ് ഇടയാഴം, കല്ലറ, നീണ്ടൂര്‍ വഴി പോകേണ്ടതാണ്. ചേര്‍ത്തല ഭാഗത്തുനിന്നും കുമരകത്തേക്ക് വരുന്ന ബസുകള്‍ മണിയാപറമ്പ് റോഡ്‌ ജംഗ്ഷനില്‍ സര്‍വീസ് നിര്‍ത്തി തിരികെ പോകേണ്ടതാണ്. വൈക്കം-കുമരകം റോഡിൽ വരുന്ന കോട്ടയം ഭാഗത്തേക്ക് പോകേണ്ട വാഹനങ്ങള്‍ ഇടയാഴം ജംഗ്ഷനില്‍നിന്നും തിരിഞ്ഞ് കല്ലറ, നീണ്ടൂര്‍ വഴി പോകേണ്ടതാണ്. കല്ലറ, നീണ്ടൂര്‍ ഭാഗങ്ങളില്‍നിന്നും പനമ്പാലം വഴി കോട്ടയം ടൗണിലേക്ക് പോകേണ്ട വാഹനങ്ങള്‍ കുടമാളൂര്‍ കുരിശുപള്ളി ജംഗ്ഷനില്‍നിന്നും തിരിഞ്ഞ് പുളിഞ്ചുവട്, കുമാരനല്ലൂര്‍ മേല്‍പ്പാലം വഴി പോകേണ്ടതാണ്. ചിങ്ങവനം ഭാഗത്തുനിന്നും കോട്ടയം ടൗണിലേക്ക് വരുന്ന പ്രൈവറ്റ് ബസുകള്‍ കോടിമത സ്റ്റാന്റില്‍ സര്‍വീസ് അവസാനിപ്പിച്ച് തിരികെ പോകേണ്ടതാണ്. ദിവാന്‍ കവലയില്‍ നിന്നും കഞ്ഞിക്കുഴി ഭാഗത്തേക്ക് വാഹനങ്ങള്‍ പോകുവാന്‍ പാടില്ല. മെഡിക്കല്‍ കോളേജ് ഭാഗത്തുനിന്നും എറണാകുളം, മൂവാറ്റുപുഴ ഭാഗങ്ങളിലേക്ക് പോകേണ്ട വാഹനങ്ങള്‍ മെഡിക്കല്‍ കോളേജ് കുരിശുപള്ളി ജംഗ്ഷനില്‍നിന്നും അമ്മഞ്ചേരി, യൂണിവേഴ്സിറ്റി, അതിരമ്പുഴ വഴി അതിരമ്പുഴ ഉപ്പുപുര ജംക്ഷനിലെത്തി ഇടത്തേക്ക് തിരിഞ്ഞ് കോട്ടമുറി, ആനമല വഴി കാണക്കാരി അമ്പലം ജംഗ്ഷനിലെത്തി പോകേണ്ടതാണ്. റോഡ് അരികുകളിലും ജംഗ്ഷനുകളിലും പാർക്കിങ്ങും, തട്ടുകട ഉൾപ്പടെയുള്ള വഴിയോര വാണിഭങ്ങളും, ഓട്ടോ, ടാക്സി സ്റ്റാൻഡുകളും, കർശനമായി നിരോധിച്ചിരിക്കുന്നു. MC റോഡിൽ തിരുവല്ല ഭാഗത്ത് നിന്നും വരുന്ന ആംബുലൻസുകളും മറ്റ് ആശുപത്രി സംബന്ധമായ എമർജൻസി വാഹനങ്ങളും ചങ്ങനാശ്ശേരി ബൈപ്പാസ് റോഡിൽ പ്രവേശിച്ച് തെങ്ങണ, പുതുപ്പള്ളി, മണർകാട്, പൂവത്തുംമൂട്, സംക്രാന്തി വഴി കോട്ടയം മെഡിക്കൽ കോളേജ് ആശുപത്രിയിൽ എത്തേണ്ടതാണ്. ആലപ്പുഴ ചേർത്തല ഭാഗത്തുനിന്നും വരുന്ന ആംബുലൻസുകളും മറ്റ് ആശുപത്രി സംബന്ധമായ എമർജൻസി വാഹനങ്ങളും ഇടയാഴം ജംഗ്ഷനിൽ നിന്നും ഇടത്തേക്ക് തിരിഞ്ഞ് കല്ലറ വഴികോട്ടയം മെഡിക്കൽ കോളേജ് ആശുപത്രിയിൽ ൽ എത്തേണ്ടതാണ്. KK റോഡിൽ നിന്നും വരുന്ന ആംബുലൻസുകളും മറ്റ് എമർജൻസി വാഹനങ്ങളും മണർകാട് എത്തി പൂവത്തുംമൂട് പാലം വഴി കോട്ടയം മെഡിക്കൽ കോളേജ് ആശുപത്രിയിൽ എത്തേണ്ടതാണ്. പാല, കുറവിലങ്ങാട്, എറണാകുളം ഭാഗങ്ങളിൽ നിന്നും വരുന്ന ആംബുലൻസുകളും മറ്റ് എമർജൻസി വാഹനങ്ങളും ഏറ്റുമാനൂർ സെൻട്രൽ ജംഗ്ഷനിൽ എത്തി അതിരമ്പുഴ യൂണിവേഴ്സിറ്റി വഴികോട്ടയം മെഡിക്കൽ കോളേജ് ആശുപത്രിയിൽ എത്തേണ്ടതാണ്.