കുമരകം: 2002 ജൂലൈ 27നാണ് ആ വാർത്ത ഞെട്ടലോടെ എല്ലാവരും കേട്ടത്. 2002 ജൂലൈ 27 നു രാവിലെ മുഹമ്മയിൽ നിന്നും കുമരകത്തേക്ക് പുറപ്പെട്ട ബോട്ട് കുമരകത്തിന് ഒരു കിലോമീറ്റർ അകലെ മണൽത്തിട്ടയിൽ തട്ടി മുങ്ങുകയായിരുന്നു.
വാർത്ത കേട്ടറിഞ്ഞവർ ഓടിയെത്തി. നാട്ടുകാർ രക്ഷാ പ്രവർത്തനങ്ങൾക്കായി മുന്നിട്ടിറങ്ങി. ഒൻപതു മാസം പ്രായമുള്ള പിഞ്ചുകുഞ്ഞടക്കം 29 പേരെ ആ അപകടം കവർന്നെടുത്തു. സംസ്ഥാന ജലഗതാഗത വകുപ്പിന്റെ എ 53 നമ്പർ ബോട്ടാണ് വേമ്പനാട്ടുകായയിലെ മണൽത്തിട്ടയിൽ തട്ടി മുങ്ങിയത്. മുഹമ്മ, കായിപ്പുറം, പുത്തനങ്ങാടി തുടങ്ങിയ സ്ഥലങ്ങളിൽ നിന്നുള്ളവരായിരുന്നു ബോട്ടിലെ യാത്രക്കാർ.
അപകടത്തെക്കുറിച്ച് അന്വേഷിക്കുവാൻ നിയോഗിക്കപ്പെട്ടിരുന്ന ജസ്റ്റീസ് നാരായണക്കുറുപ്പ് കമ്മിഷൻ മരണമടഞ്ഞവരുടെ ആശ്രിതർക്ക് 91.6 ലക്ഷം രൂപ നഷ്ടപരിഹാരം നൽകാൻ ശുപാർശ ചെയ്തിരുന്നു. 15 സ്ത്രീകളും 13 പുരുഷന്മാരുമാണ് നാടിനെ നടുക്കിയ ദുരന്തത്തിൽ മരണപ്പെട്ടത്. നടുക്കുന്ന ഓർമ്മകൾക്ക് മുന്നിൽ എല്ലാ വർഷവും അനുസ്മരണവും പുഷ്പ്പാർച്ചനയും നടത്തുന്നുണ്ട്. മുഹമ്മയിൽ നിന്ന് മുഴുവൻ യാത്രക്കാരുമായി പുലർച്ചെ 5.45 ന് കുമരകത്തേക്ക് പോവുകയായിരുന്ന ബോട്ടായിരുന്നു അപകടത്തിൽപ്പെട്ടത്. പി‌എസ്‌സി ഉദ്യോഗാർത്ഥികളായിരുന്നു ബോട്ടിലുണ്ടായിരുന്നവരിൽ ഭൂരിഭാഗവും. ലാസ്റ്റ് ഗ്രേഡ് സെർവന്റ് പരീക്ഷ എഴുതാൻ കോട്ടയത്തേക്ക് പോയവരായിരുന്നു ബോട്ടിലുണ്ടായിരുന്നത്. അപകടത്തെത്തുടർന്ന് ബോട്ട് മാസ്റ്റർ ഉൾപ്പെടെ നാല് പേർ കേസിൽ 15 വർഷത്തേക്ക് വിചാരണ നേരിട്ടു. 2019 ൽ കോടതി അവരെ വിട്ടയച്ചു. അപകടത്തിന് കാരണമായ ബോട്ട് പിന്നീട് ജലഗതാഗത വകുപ്പ് ലേലം ചെയ്തു.
