മുണ്ടക്കയം: മുണ്ടക്കയത്ത് ബസ്സ് യാത്രക്കിടെ അബോധാവസ്ഥയിലായ വയോധികയെ ആശുപത്രിയിലെത്തിച്ച് കെ.എസ്.ആർ.ടി.സി ജീവനക്കാർ. ശനിയാഴ്ച ഉച്ചകഴിഞ്ഞാണ്‌ സംഭവം. കോട്ടയത്തു നിന്നും ചെമ്മണ്ണാറിലേക്ക് പോകുകയായിരുന്ന കെ.എസ്.ആർ.ടി.സി ബസ്സിലെ വയോധികയായ യാത്രക്കാരിക്ക് ചിറ്റടിയായപ്പോഴേക്കും അസ്വസ്ഥതകൾ അനുഭവപ്പെടുകയായിരുന്നു. ഒപ്പമുണ്ടായിരുന്ന വീട്ടമ്മയും മകളും ഇവരെ വിളിച്ചുണർത്താൻ നോക്കിയെങ്കിലും സാധിക്കാതെ വന്നതോടെ ബസ്സ് കണ്ടകട്രെ വിവരമറിയിക്കുകയായിരുന്നു. തുടർന്ന് ബസ് കണ്ടക്ടർ പത്തനംതിട്ട പ്രമാടം സ്വദേശി കെന്തലയിൽ അരുൺ എസ്. ധരൻ, ഡ്രൈവർ ആർപ്പൂക്കര കൊച്ചുപറമ്പിൽ കെ.എ.പ്രമോദ് എന്നിവർ ചേർന്ന് യാത്രക്കാരിയെ ആശുപത്രിയിൽ എത്തിക്കാൻ തീരുമാനിക്കുകയായിരുന്നു. തുടർന്ന് യാത്രക്കാരിയെ മുണ്ടക്കയം സർക്കാർ ആശുപത്രിയിൽ എത്തിക്കുകയായിരുന്നു. മണർകാട് പള്ളിയിൽ പോയ ശേഷം കട്ടപ്പനയിലെ വീട്ടിലേക്ക് മടങ്ങുകയായിരുന്നു വയോധിക.
