കോട്ടയം: കോട്ടയം ജില്ലയിൽ ഭക്ഷ്യസുരക്ഷാ വകുപ്പിന്‍റെ നേതൃത്വത്തിൽ നടത്തിയ പരിശോധനയിൽ 112 സ്ഥാപനത്തിന് പിഴ ഈടാക്കാൻ നോട്ടീസ് നൽകി. ഭക്ഷ്യസുരക്ഷാ വകുപ്പിന്‍റെ പ്രത്യേക സ്‌ക്വാഡ് ആണ് പരിശോധന നടത്തുന്നത്.
ഹോട്ടൽ, റസ്റ്റാറന്‍റുകൾ, ഷവർമ ഷോപ്പുകൾ, ബേക്കറികൾ, ഭക്ഷ്യ വിതരണ സ്ഥാപനങ്ങൾ എന്നിവിടങ്ങളിലാണ് പരിശോധന നടത്തിയത്. 230 വ്യാപാര സ്ഥാപനങ്ങളിലാണ് ഭക്ഷ്യ സുരക്ഷാ വകുപ്പ് പരിശോധന നടത്തിയത്. പരിശോധനയിൽ കാലാവധി കഴിഞ്ഞശേഷവും ഫ്രീസറിൽ സൂക്ഷിച്ചിരുന്ന 123 പാക്കറ്റ് പാൽ അധികൃതർ നശിപ്പിച്ചു കളഞ്ഞു.
11 വ്യാപാര സ്ഥാപനങ്ങൾക്ക് അപാകതകൾ പരിഹരിക്കാനായി നോട്ടീസ് നൽകിയതായും ഭക്ഷ്യ സുരക്ഷാ വകുപ്പ് ഉദ്യോഗസ്ഥർ പറഞ്ഞു. ഭക്ഷണ സാധനങ്ങൾ പാർസൽ നൽകുന്ന സ്ഥാപനങ്ങൾ പാക്കിങ് തീയതി, സമയം, രണ്ടു മണിക്കൂറിനകം ഉപയോഗിക്കണം എന്ന ലേബൽ പതിച്ചിട്ടുണ്ടോ എന്നും ഭക്ഷ്യ സുരക്ഷാ ലൈസൻസ്,ഹെൽത്ത് കാർഡ് എന്നിവയുണ്ടോ എന്നുമാണ് സംഘം പരിശോധിച്ചത്.
