കോട്ടയം: കോട്ടയം ജില്ലയിലെ വിനോദസഞ്ചാരവുമായി ബന്ധപ്പെട്ട വിവരങ്ങൾ സഞ്ചാരികൾക്ക് വിരൽത്തുമ്പിൽ ലഭ്യമാക്കുന്ന 'കോട്ടയം ടൂറിസം' മൊബൈൽ ആപ്ലിക്കേഷൻ ടൂറിസം മേഖലയുടെ വികസനത്തിന് ഉണർവേകുമെന്നു സഹകരണ-സാംസ്‌കാരിക വകുപ്പു മന്ത്രി വി.എൻ. വാസവൻ പറഞ്ഞു.
ടൂറിസം വകുപ്പ് തയാറാക്കിയ 'കോട്ടയം ടൂറിസം' മൊബൈൽ ആപ്ലിക്കേഷന്റെ പ്രകാശനം കളക്‌ട്രേറ്റിലെ വിപഞ്ചിക കോൺഫറൻസ് ഹാളിൽ നിർവഹിച്ച് പ്രസംഗിക്കുകയായിരുന്നു മന്ത്രി. കോവിഡ് കാലത്തെ അതിജീവിച്ച് തിരികെവരുന്ന വിനോദസഞ്ചാരമേഖലയ്ക്ക് ശക്തി പകരാൻ ആപ്പ് ഉപകരിക്കുമെന്നും മന്ത്രി പറഞ്ഞു. ജില്ലാ കളക്ടർ ഡോ. പി.കെ. ജയശ്രീ യോഗത്തിൽ അധ്യക്ഷത വഹിച്ചു. എൻ.ഐ.സി. ജില്ലാ ഇൻഫർമാറ്റിക്‌സ് ഓഫീസർ ബീന സിറിൽ പൊടിപാറ, അഡീഷണൽ ജില്ലാ മജിസ്‌ട്രേറ്റ് ജിനു പുന്നൂസ്, ടൂറിസം ഡെപ്യൂട്ടി ഡയറക്ടർ ജി. ശ്രീകുമാർ, ജില്ലാ ഇൻഫർമേഷൻ ഓഫീസർ എ. അരുൺ കുമാർ എന്നിവർ പ്രസംഗിച്ചു.
ആപ്ലിക്കേഷൻ തയാറാക്കിയ നാഷണൽ ഇൻഫർമാറ്റിക് സെന്ററിലെ ജില്ലാ ഇൻഫർമാറ്റിക്‌സ് ഓഫീസർ ബീന സിറിൽ പൊടിപാറ, അസിസ്റ്റന്റ് ജില്ലാ ഇൻഫർമാറ്റിക്‌സ് ഓഫീസർ റോയി ജോസഫ്, ഡെവലപ്പർ ക്രിസ് എൽസ ജോൺ, നെറ്റ്‌വർക് എൻജിനീയർമാരായ പ്രിയൻ ജോൺ തോമസ്, പി.എം. ഡിപിൻ മോഹൻ എന്നിവർക്ക് പ്രശംസാപത്രം മന്ത്രി കൈമാറി. നാഷണൽ ഇൻഫർമാറ്റിക് സെന്റർ തയാറാക്കിയ ആപ്ലിക്കേഷൻ പ്ലേ സ്റ്റോറിൽ നിന്ന് സൗജന്യമായി ഡൗൺ ലോഡ് ചെയ്യാം.
ജില്ലയിലെ കായലുകൾ, ഉൾനാടൻ ജലാശയങ്ങൾ, വിനോദസഞ്ചാര കേന്ദ്രങ്ങൾ, പൈതൃകങ്ങൾ, മലയോര വിനോദ സഞ്ചാര കേന്ദ്രങ്ങൾ, തീർത്ഥാടനകേന്ദ്രങ്ങൾ, ആയുർവേദ കേന്ദ്രങ്ങൾ, ഗൃഹസ്ഥലീസ്, പൊതുമരാമത്ത് വകുപ്പ്് റസ്റ്റ് ഹൗസുകളും ഗസ്റ്റ് ഹൗസുകളും, റിസോർട്ടുകൾ, ഹോട്ടലുകൾ, ഹോംസ്റ്റേകൾ, സർവീസ്ഡ് വില്ലകൾ തുടങ്ങിയ വിശദമായ വിവരങ്ങൾ ആപ്ലിക്കേഷനിൽ ലഭിക്കും.
