ആലപ്പുഴ: ജലോത്സവങ്ങളുടെ നാടിന്റെ പുതിയ ജില്ലാ കലക്ടറായി അഞ്ചുവിളക്കിന്റെ നാട്ടുകാരി, ആലപ്പുഴയുടെ 53 മത് ജില്ലാ കളക്ടറായി കോട്ടയം ചങ്ങനാശ്ശേരി സ്വദേശിനി ഡോ.രേണുരാജ് ചുമതലയേറ്റു. മുൻ ജില്ലാ കളക്ടര്‍ എ.അലക്സാണ്ടർ സര്‍വീസില്‍ നിന്ന് വിരമിച്ച ഒഴിവിലാണ് രേണുരാജിന്റെ നിയമനം.
ഇന്ന് രാവിലെ ജില്ലാ കളക്ട്രേറ്റിൽ എത്തി ആലപ്പുഴയുടെ ജില്ലാ കലക്ടറായി ഡോ.രേണുരാജ് ചുമതലയേറ്റു.അമൃത് മിഷൻ ഡയറക്ടറായ ഡോ. രേണു രാജ് ആലപ്പുഴയുടെ 53 മത് ജില്ലാ കലക്ടറായാണ് സ്ഥാനമേൽക്കുന്നത്. ചങ്ങനാശ്ശേരി മലകുന്നം സ്വദേശി ശ്രീശൈലത്തിൽ എം കെ രാജകുമാരൻ നായരുടെയും വി എൻ ലതയുടെയും മകളായ രേണുരാജ് 2014-ലെ സിവിൽ സർവ്വീസ് പരീക്ഷയിൽ ദേശീയതലത്തിൽ രണ്ടാം റാങ്കുകാരിയായിരുന്നു.
കോട്ടയം മെഡിക്കൽ കോളേജിലാണ് എംബിബിഎസ് പഠനം പൂർത്തിയാക്കിയത്. ദേവികുളം,തൃശൂർ എന്നിവിടങ്ങളിൽ സബ് കലക്ടറായി സേവനമനുഷ്ടിച്ചിട്ടുണ്ട്. കോവിഡ് പ്രതിരോധ പ്രവർത്തനങ്ങളിലും പ്രളയകാലത്തും കോട്ടയം ജില്ലയിൽ ജില്ലാ കളക്ടറെ സഹായിക്കുന്നതിനായി സർക്കാർ രേണുരാജിനെ നിയമിച്ചിരുന്നു.
