ചങ്ങനാശ്ശേരി: ചങ്ങനാശേരിയിൽ നിയന്ത്രണം വിട്ടകാർ സ്‌കൂട്ടറുമായി കൂട്ടിയിടിച്ചുണ്ടായ അപകടത്തിൽ സ്‌കൂട്ടർ യാത്രികരായ ദമ്പതികൾക്ക് ദാരുണാന്ത്യം. എം.സി റോഡിൽ ചങ്ങനാശേരി തുരുത്തി പുന്നമൂട് ജംഗ്ഷനിൽ ഇന്ന് ഉച്ചക്ക് 3 മണിയോടെയാണ് അപകടം ഉണ്ടായത്.
ചങ്ങനാശേരി ഭാഗത്തു നിന്നും അമിത വേഗത്തിൽ എത്തിയ കാർ നിയന്ത്രണം നഷ്ടമായതിനെ തുടർന്ന് കോട്ടയം ഭാഗത്തു നിന്നും എതിർദിശയിൽ എത്തിയ സ്‌കൂട്ടർ യാത്രികരെ ഇടിച്ചു തെറിപ്പിക്കുകയായിരുന്നു. സ്‌കൂട്ടർ യാത്രികരായ കുറിച്ചി സ്വദേശികളായ ദമ്പതികളാണ് മരിച്ചത്. അപകടത്തിൽ സ്‌കൂട്ടർ യാത്രികരായ ഇരുവർക്കും ഗുരുതരമായി പരിക്കേറ്റു.
ഇരുവരെയും അപകടം കണ്ടു ഓടിക്കൂടിയ നാട്ടുകാർ ഇരുവരെയും കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മൃതദേഹങ്ങൾ കോട്ടയം മെഡിക്കൽ കോളേജ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നിയന്ത്രണംവിട്ട കാർ സ്‌കൂട്ടറിൽ ഇടിക്കുകയും അപകടത്തിൽ സ്‌കൂട്ടറുമായി നിരങ്ങി നീങ്ങിയ കാർ സമീപത്തെ ചായക്കടയിൽ ഇടിച്ചു നിൽക്കുകയായിരുന്നു. ചങ്ങനാശേരി, ചിങ്ങവനം പൊലീസ് സ്ഥലത്തെത്തി മേൽനടപടിക സ്വീകരിച്ചു.
