കോട്ടയം: ക്ഷയരോഗ നിവാരണ പ്രവർത്തനങ്ങളുടെ ഭാഗമായി നടത്തുന്ന ദേശീയ ക്ഷയരോഗ സർവ്വേ കോട്ടയം ജില്ലയിൽ ആരംഭിച്ചു. രോഗലക്ഷണങ്ങൾ പരിശോധിക്കുന്നതിന് തെരെഞ്ഞെടുക്കപ്പെട്ട തദ്ദേശ സ്ഥാപനങ്ങളിലെ പതിനായിരം വീടുകളിലാണ് സർവ്വേ.
ബ്ലഡ് ഡോണേഴ്സ് കേരള എന്ന സന്നദ്ധ സംഘടനയുടെ 30 വളണ്ടിയർമാരാണ് സർവ്വേ നടത്തുക. വീടുകളിൽ ആർക്കെങ്കിലും ക്ഷയ രോഗ ലക്ഷങ്ങളുണ്ടോ എന്ന് മനസിലാക്കി ലക്ഷണമുള്ളവരിൽ നിന്ന് കഫം ശേഖരിച്ച് പരിശോധന നടത്തി ഉറപ്പുവരുത്തും. രോഗം സ്ഥിരീകരിക്കപ്പെടുന്നവരുടെ എണ്ണം കണ്ടെത്തി ജില്ലയിലെ രോഗ വ്യാപനത്തോത് മനസിലാക്കുന്നതിനുള്ള സർവേ മാർച്ച് 24 ന് പൂർത്തിയാക്കാനാണ് ലക്ഷ്യമിടുന്നത്.
ജില്ലാ മെഡിക്കൽ ഓഫീസർ ഡോ. എൻ.പ്രിയ വളണ്ടിയർ കൂടി ആയ ഡോ. വിശാൽ സോണിയ്ക്ക് സർവ്വേയ്ക്ക് ആവശ്യമായ കിറ്റ് നൽകി പരിപടി ഉദ്ഘാടനം ചെയ്തു. ഡെപ്യൂട്ടി ജില്ലാ മെഡിക്കൽ ഓഫീസർ ഡോ. വിദ്യാധരൻ, ജില്ലാ ടി ബി ഓഫീസർ ഡോ. ട്വിങ്കിൾ പ്രഭാകരൻ, ജില്ലാ മാസ് മീഡിയ ഓഫീസർ ഡോമി തുടങ്ങിയവർ പങ്കെടുത്തു.
