കോട്ടയം: കർഷക പ്രക്ഷോഭം കേന്ദ്ര സർക്കാരിന്റേതു കർഷകർക്കെതിരെയുള്ള തുറന്ന യുദ്ധമാണെന്നു മുൻമുഖ്യമന്ത്രി ഉമ്മൻ ചാണ്ടി. രാജ്യത്തെ കര്ഷകര് ദിവസങ്ങളായി നടത്തിവരുന്ന പ്രക്ഷോഭം കണ്ടില്ലെന്നു നടക്കുന്ന മോഡി ഭരണകൂടം തീക്കളിയാണ് നടത്തുന്നത് എന്നും അദ്ദേഹം പറഞ്ഞു. പതിനായിരക്കണക്കിന് കര്ഷകരാണ് ഡല്ഹിയുടെ പ്രാന്തപ്രദേശങ്ങളില് തമ്പടിച്ചിരിക്കുന്നത്. പഞ്ചാബ്, ഹരിയാന എന്നിവിടങ്ങളില് നിന്നുള്ള കര്ഷകര്ക്കു പുറമെ മറ്റ് സംസ്ഥാനങ്ങളില് നിന്നുള്ള കര്ഷകര്കൂടി എത്തുന്നതോടെ ഡല്ഹി ചലോ മാര്ച്ച് കര്ഷകസാഗരമായി മാറുമെന്നും ഉമ്മൻ ചാണ്ടി പറഞ്ഞു. കര്ഷകര് ഡല്ഹിയില് എത്താതിരിക്കാന് സര്ക്കാര് പരമാവധി തടസങ്ങള് ഉണ്ടാക്കി. എല്ലാ റോഡുകളും ബ്ലോക്ക് ചെയ്തു. കര്ഷകര്ക്കു നേരേ ജലപീരങ്കിയും ഗ്രനേഡും പ്രയോഗിച്ചു. റോഡുനീളെ മുള്വേലി ഉയര്ത്തി. 9 സ്റ്റേഡിയങ്ങള് ജയിലാക്കി അതിലടയ്ക്കാന് ശ്രമിച്ചു. യുദ്ധസമാനമായ അന്തരീക്ഷമാണ് കേന്ദ്രസര്ക്കാര് സൃഷ്ടിച്ചത്. കര്ഷകരെ കേള്ക്കാന് മോഡി ഭരണകൂടം തയാറാകുന്നില്ല. കര്ഷകരുടെ രക്ഷയ്ക്കുവേണ്ടിയാണ് കേന്ദ്രസര്ക്കാര് കാര്ഷിക നിയമം കൊണ്ടുവന്നത് എന്ന് പ്രധാനമന്ത്രി മന് കീ ബാത്തില് ആവര്ത്തിച്ചു എന്നും എന്നാൽ അത് കർഷകരെ ബോധ്യപ്പെടുത്താൻ സർക്കാർ ശ്രമിക്കുന്നില്ലെന്നും ഉമ്മൻ ചാണ്ടി പറഞ്ഞു. കഴിഞ്ഞ സെപ്റ്റംബര് 17ന് പാര്ലമെന്റ് പാസാക്കിയ 3 കര്ഷക നിയമങ്ങളാണ് കര്ഷകരെ പ്രക്ഷോഭത്തിലേക്ക് വലിച്ചെറിഞ്ഞത് എന്നും കര്ഷകവിരോധമാണ് ഈ സര്ക്കാരിന്റെ മുഖമുദ്ര എന്നും അദ്ദേഹം പറഞ്ഞു.
