കോട്ടയം മെഡിക്കൽ കോളേജ് പുതിയ സർജിക്കൽ ബ്ലോക്കിൽ സീലിം​ഗ് അടർന്നുവീണു; രോ​ഗികള്‍ രക്ഷപ്പെട്ടത് തലനാരിഴയ്ക്ക്.

കോട്ടയം: കോട്ടയം മെഡിക്കൽ കോളേജ് ആശുപത്രിയിൽ പുതിയ സർജിക്കൽ ബ്ലോക്കിലെ കെട്ടിടത്തിന്റെ സീലിംഗ് അടർന്നു വീണു. കഴിഞ്ഞ ഫെബ്രുവരിയിൽ മുഖ്യമന്ത്രിയായിരുന്ന പിണറായി വിജയൻ ഉദ്ഘാടനം ചെയ്ത കെട്ടിടമാണിത്.

ഉദ്ഘാടനം ചെയ്ത് എട്ട് മാസങ്ങള്‍ പിന്നിടുമ്പോഴാണ് അപകടം ഉണ്ടായിരിക്കുന്നത്. കണ്ണുപരിശോധനയ്ക്കായി നിരവധി ആളുകള്‍ ദിനംപ്രതി എത്തുന്ന റെറ്റിന പരിശോധന മുറിക്ക് സമീപമാണ് സീലിം​ഗ് അടർന്നു വീണത്.

സ്ഥലത്തുണ്ടായിരുന്ന രോഗികളും ഒപ്പമുണ്ടായിരുന്നവരും തലനാരിഴയ്ക്ക് ആണ് രക്ഷപ്പെട്ടത്. ദിവസേന നൂറുകണക്കിന് രോഗികളാണ് ഇവിടെ എത്തുന്നത്. നിർമ്മാണത്തിലെ അശാസ്ത്രീയതകളും ഗുണമേന്മയില്ലാത്തതും പാകപ്പിഴകളുമാണ് സീലിംഗ് അടർന്നു വീഴാൻ കാരണമെന്ന് ആക്ഷേപമുയരുന്നുണ്ട്.