തദ്ദേശ തെരഞ്ഞെടുപ്പ്: നാമനിർദേശ പത്രിക സമർപ്പണം ഇന്നു കൂടി; ജില്ലയിൽ പത്രിക സമർപ്പിച്ചത് 3364 പേർ.

കോട്ടയം: തദ്ദേശ തെരഞ്ഞെടുപ്പിലേക്കുള്ള നാമനിർദേശ പത്രിക സമർപ്പണത്തിനുള്ള സമയപരിധി വെള്ളിയാഴ്ച  അവസാനിക്കാനിരിക്കേ കോട്ടയം  ജില്ലയിൽ 3364 സ്ഥാനാർഥികളാണ് പത്രിക നൽകിയത്. ഇവരിൽ 1536 പുരുഷന്മാരും 1828 സ്ത്രീകളും ആണ്. 5513 സെറ്റ് പത്രികകളാണ് ആകെ ലഭിച്ചത്. ജില്ലാ പഞ്ചായത്ത് ഡിവിഷനുകളിലെ മത്സരത്തിന് ആകെ 59 പേർ 108 സെറ്റ് പത്രികകളാണ് ഇതുവരെ നൽകിയത്.  വ്യാഴാഴ്ച മാത്രം 35 പേർ 66 സെറ്റ് പത്രികകൾ നൽകി. ഇന്ന് ഉച്ചകഴിഞ്ഞ് മൂന്നു  വരെ പത്രിക സമർപ്പിക്കാം. നാമനിർദ്ദേശ പത്രിക കളുടെ സൂക്ഷ്മപരിശോധന നവംബർ 22ന് നടക്കും. നവംബർ 24 ഉച്ചകഴിഞ്ഞ് മൂന്നു വരെ സ്ഥാനാർത്ഥിത്വം പിൻവലിക്കാം.