കോട്ടയം: കോട്ടയത്തു നിന്നും ബൈസൺവാലിയിലേക്ക് ഇനി തകർപ്പൻ യാത്ര പോകാം നമ്മുടെ സ്വന്തം കെ എസ് ആർ ടി സി ലിങ്ക് ബസ്സിൽ. കെ എസ് ആർ ടി സി നടപ്പിലാക്കിയ ഫാസ്റ്റ് പാസഞ്ചർ ലിങ്ക് ബസ്സ് സംവിധാനത്തിലൂടെ ജില്ലയിൽ കോട്ടയം ഡിപ്പോയ്ക്ക് ലഭിച്ച ബസ്സാണ് ബൈസൺവാലിയിലേക്ക് സർവ്വീസ് നടത്തുന്നത്. ബൈസൺവാലിയിലെ പ്രകൃതി സൗന്ദര്യ കാഴ്ചകൾ ഇനി കെ എസ് ആർ ടി സി യിലൂടെ കാണാം. ദിവസവും രാവിലെ 10:25 നു ബസ്സ് കോട്ടയത്തു നിന്നും പുറപ്പെടും. വൈകിട്ട് 4 മണിക്ക് മുട്ടുകാട് എത്തും. തിരികെ പുലർച്ചെ 3:40 നു കോട്ടയത്തേക്ക് തിരിക്കും, രാവിലെ 9 മണിക്ക് കോട്ടയത്ത് എത്തും. കോട്ടയത്തു നിന്നും മെഡിക്കൽ കോളേജ്, ഏറ്റുമാനൂർ, ഉഴവൂർ, കൂത്താട്ടുകുളം,മൂവാറ്റുപുഴ, കോതമംഗലം,നേര്യമംഗലം, അടിമാലി,കുഞ്ചിത്തണ്ണി, ബൈസൺ വാലി, മുട്ടുകാട് എന്നിങ്ങനെയാണ് യാത്ര. ഇരുവശത്തും 2 സീറ്റുകൾ വീതമുള്ള 38 സീറ്റ് ബസ്സാണ് ഇത്. യാത്രക്കാർക്ക് കൂടുതൽ യാത്രാ സൗകര്യങ്ങൾ ലഭ്യമാക്കുന്നതിന്റെ ഭാഗമായാണ് കെ എസ് ആർ ടി സി പുതിയ പദ്ധതികൾ ആവിഷ്കരിക്കുന്നത്.
