കോട്ടയം: ഇന്നലെ മുതൽ തുടരുന്ന അതിശക്തമായ തീവ്ര മഴയിൽ കോട്ടയം ജില്ലയിൽ മഴ ശക്തമായി തുടരുന്നു. അതിശക്തമായ മഴയാണ് ജില്ലയുടെ മലയോര മേഖലകളിലുൾപ്പടെ പെയ്യുന്നത്. ഇന്നലെ രാവിലെ മുതൽ പെയ്യാൻ ആരംഭിച്ച ശക്തമായ മഴ ഇപ്പോഴും തുടരുകയാണ്.
.jpeg)
അതിശക്തമായ മഴയിൽ ജില്ലയിലെ നദികളിലും തോടുകളിലും ജലനിരപ്പ് ഉയർന്നു നിൽക്കുകയാണ്. പ്രധാന നദികളായ മണിമല,മീനച്ചിൽ ആറുകളിൽ ജലനിരപ്പ് ഉയർന്നിരിക്കുകയാണ്. മണിമലയാറ്റിൽ മുണ്ടക്കയം,എരുമേലി-ഓരുങ്കൽ കടവ് മേഖലകളിൽ ജലനിരപ്പ് അപകടകരമായനിലയിൽ ഉയർന്നു നിൽക്കുകയാണ്.
കനത്ത മഴയുടെ സാഹചര്യത്തിൽ കോട്ടയം ജില്ലയിൽ ഇന്ന് ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. വടക്കു പടിഞ്ഞാറൻ ബംഗാൾ ഉൾക്കടലിനും ഒഡിഷ, പശ്ചിമ ബംഗാൾ തീരത്തിനും മുകളിലായി ന്യൂനമർദ്ദം രൂപപെട്ടതായും പടിഞ്ഞാറ് വടക്കു പടിഞ്ഞാറ് ദിശയിൽ വടക്കൻ ഒഡിഷ, ഗംഗ തട പശ്ചിമ ബംഗാൾ, ജാർഖണ്ഡ്, ഛത്തീസ്ഗഡ് മേഖലയിലേക്ക് നീങ്ങാൻ സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു. കേരളത്തിൽ അടുത്ത 5 ദിവസം അതിശക്തമായ മഴയ്ക്കും കാറ്റിനും സാധ്യതയുണ്ടെന്നു കേന്ദ്ര കാലാവസ്ഥാ വകുപ്പ് അറിയിച്ചു.
