കോട്ടയം: കേരളത്തിൽ സർക്കാർ ആശുപത്രിയിൽ മെഡിക്കൽ ഓഫീസറായി സേവനം ചെയ്യുന്ന ആദ്യ സന്യാസിനിയായി പാലാ സ്വദേശിനി സിസ്റ്റർ ഡോ.ജീൻ റോസ്.
മറയൂർ കുടുംബാരോഗ്യ കേന്ദ്രത്തിലെ മെഡിക്കൽ ഓഫീസറായാണ് അഗതികളുടെ സന്യാസിനീ സമൂഹാംഗമായ(സിസ്റ്റേഴ്സ് ഓഫ് ദി ഡെസ്റ്റിറ്റ്യൂട്ട്) സിസ്റ്റർ ഡോ. ജീൻ റോസ്(50) എന്ന ഡോ.റോസമ്മ തോമസ് ചുമതലയേറ്റിരിക്കുന്നത്. പാലാ ചേറ്റുതോട് മുകളേൽ തോമസിന്റെയും റോസമ്മയുടെയും മകളാണ് സിസിറ്റർ ജീൻ. ബാംഗ്ലൂർ സെന്റ് ജോൺസ് മെഡിക്കൽ കോളേജിൽ നിന്നും എം ബി ബി എസ് പഠനവും അനസ്തേഷ്യയിൽ ഉപരിപഠനവും പൂർത്തിയാക്കി. പി എസ് സി യിലൂടെ ആദ്യ നിയമനം ലഭിച്ചത് കട്ടപ്പന താലൂക്ക് ആശുപത്രിയിലായിരിന്നു. മുൻപ് മറയൂരിൽ സഭയുടെ നിയന്ത്രണത്തിലുള്ള സ്വകാര്യ ആശുപത്രിയിൽ പത്തുവർഷക്കാലം സേവനമനുഷ്ഠിച്ചിരുന്നു. നിരവധി ഗോത്രവർഗക്കാരും ആദിവാസി വിഭാഗങ്ങളും തിങ്ങിപ്പാർക്കുന്ന മറയൂർ മേഖലയിൽ അവർക്കുവേണ്ടി സേവനം ചെയ്യാനുള്ള അവസരം ചോദിച്ചു വാങ്ങുകയായിരുന്നു എന്ന് സിസ്റ്റർ പറയുന്നു.
