കുടുംബാംഗങ്ങളെയും സുഹൃത്തുക്കളെയും തീരാദുഃഖത്തിലാഴ്ത്തി ജിജോമോന്റെ വേർപാട്, വിവാഹാഘോഷങ്ങൾ നടക്കേണ്ടിയിരുന്ന വീട് വിധിയുടെ ക്രൂരതയിൽ അന്ത്യ കർമ്മങ്ങൾക്


കോട്ടയം: കുടുംബാംഗങ്ങളെയും സുഹൃത്തുക്കളെയും തീരാദുഃഖത്തിലാഴ്ത്തി ജിജോമോന്റെ വേർപാട്. കടപ്ലാമറ്റം വയലാ നെല്ലിക്കുന്നു ഭാഗത്തു കൊച്ചുപാറയിൽ ജിൻസൻ-നിഷ ദമ്പതികളുടെ മകൻ ജിജോമോൻ ജിൻസൺ (21) ആണ് മരിച്ചത്. ഇന്നലെ രാത്രി 10 മണിയോടെ എംസി റോഡിൽ കാളികാവ് പള്ളിയുടെ സമീപം വാനും ബൈക്കും കൂട്ടിയിടിച്ചാണ് അപകടം ഉണ്ടായത്. ഒപ്പമുണ്ടായിരുന്ന വയലാ സ്വദേശി അജിത്തിനെ ഗുരുതര പരിക്കുകളോടെ കോട്ടയം മോഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇന്ന് രാവിലെ ഇലക്കാട് പള്ളിയിൽ ജിജോമോന്റെ വിവാഹം നടക്കാനിരിക്കെയാണ് ദാരുണാന്ത്യം സംഭവിച്ചത്. വയലാ സ്വദേശിനിയായ യുവതിയുമായായിരുന്നു ജിജോ മോന്റെ വിവാഹം നിശ്ചയിച്ചിരുന്നത്. ഞെട്ടലോടെയാണ് ബന്ധുക്കളും സുഹൃത്തുക്കളും നാട്ടുകാരും ജിജോമോന്റെ അപകട മരണ വാർത്ത അറിഞ്ഞത്. ഇതോടെ വിവാഹാഘോഷങ്ങൾ നടക്കേണ്ടിയിരുന്ന വീട് വിധിയുടെ ക്രൂരതയിൽ അന്ത്യ കർമ്മങ്ങൾക്ക് സാക്ഷിയാകുന്ന വേദനാ ജനകമായ കാഴ്ചയ്ക്കാണ് നാട് സാക്ഷ്യം വഹിച്ചത്.    വിവാഹ ഒരുക്കങ്ങളുമായി ബന്ധപ്പെട്ടു പോയി മടങ്ങി വരുന്നതിനിടെയാണ് അപകടം ഉണ്ടായത്. അപകടം കണ്ടു ഓടിയെത്തിയ നാട്ടുകാർ ഇരുവരെയും ഉടൻ തന്നെ മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജിജോമോന്റെ ജീവൻ രക്ഷിക്കാൻ സാധിച്ചില്ല. ദിയ,ജീന എന്നിവരാണ് ജിജോമോന്റെ സഹോദരിമാർ. സംസ്കാരം  ഇലക്കാട് പള്ളിയിൽ നടന്നു.