മുണ്ടക്കയം: മധുരയിൽ നിന്നും കോട്ടയത്തേക്ക് വരികയായിരുന്ന ആംബുലൻസ് ദേശീയപാതയിൽ അപകടത്തിൽപ്പെട്ടു സ്‌കൂട്ടർ യാത്രികൻ ഉൾപ്പടെ 3 പേർക്ക് പരിക്ക്. ദേശീയപാതയിൽ മുണ്ടക്കയം കുട്ടിക്കാനം റോഡിൽ പുല്ലുപാറയ്ക്ക് സമീപമാണ് അപകടം ഉണ്ടായത്.
മധുരയിൽ നിന്നും കോട്ടയം പുതുപ്പള്ളിയിലേക്ക് വരികയായിരുന്ന പുതുപ്പള്ളി സർവീസ് സഹകരണ ബാങ്കിന്റെ ആംബുലൻസാണ് ബ്രേക്ക് നഷ്ടമായതിനെ തുടർന്ന് അപകടത്തിൽപ്പെട്ടത്. മുണ്ടക്കയത്തേക്ക് വരുന്നതിനിടെ പുല്ലുപാറയ്ക്ക് സമീപം ബ്രേക്ക് നഷ്ടമായ വാഹനം കുന്നിൻ ചരുവിൽ ഇടിച്ചു നിർത്താൻ ശ്രമിക്കുന്നതിനിടെ തലകീഴായി മറിയുകയായിരുന്നു.
ഇതിനിടെ ഈ സമയം ഇതുവഴിയെത്തിയ സ്‌കൂട്ടറിൽ ആംബുലൻസ് ഇടിക്കുകയായിരുന്നു. അപകടത്തിൽ ആംബുലൻസിലുണ്ടായിരുന്ന 2 പേർക്കും സ്‌കൂട്ടർ യാത്രികനായ ഏലപ്പാറ സ്വദേശി അബ്ദുൽ കരീമിനും പരിക്കേറ്റു. ഇവരെ മുണ്ടക്കയത്ത് സ്വകാര്യ ആശുപത്രിയിൽ പ്രവേശിപ്പിച്ചു. അഗ്നിരക്ഷാ സേനയും ഹൈവേ പോലീസും രക്ഷാപ്രവർത്തനങ്ങൾക്ക് നേതൃത്വം നൽകി.
