ചരിത്ര നേട്ടവുമായി കെ.എസ്.ആര്‍.ടി.സി! നിലയ്ക്കല്‍ ഡിപ്പോയില്‍ നിന്ന് ഏഴ് കോടി വരുമാനം,കെ.എസ്.ആര്‍.ടി.സി പമ്പ-നിലയ്ക്കല്‍ ചെയിന്‍ സര്‍വീസുകള്‍ക്ക് സര്‍വകാല നേട്ടം.

പമ്പ: കെ.എസ്.ആര്‍.ടി.സി പമ്പ-നിലയ്ക്കല്‍ ചെയിന്‍ സര്‍വീസുകള്‍ക്ക് സര്‍വകാല നേട്ടം. മണ്ഡലകാലം തുടങ്ങി നവംബര്‍ 30 വരെ 6,79,68,884 രൂപയുടെ കളക്ഷനാണ് നേടിയത്. നിലയ്ക്കലില്‍ നിന്നും പമ്പയിലേക്കുള്ള (17.5 കിലോമീറ്റര്‍) ചെയിന്‍ സര്‍വീസിലൂടെ മാത്രം 10,93,716 പേരാണ് ശബരിമലയില്‍ എത്തിയത്.

ശബരിമല മണ്ഡലകാലം മഹോത്സവവുമായി ബന്ധപ്പെട്ട് വിപുലമായ ക്രമീകരണങ്ങളാണ് കെ.എസ്.ആര്‍.ടി.സി ഒരുക്കിയിരിക്കുന്നത്. നിലയ്ക്കല്‍-പമ്പ 171 ചെയിന്‍ സര്‍വീസുകള്‍, 40 തോളം കെ.എസ്.ആര്‍.ടി.സി അധിക സര്‍വീസുകളും, പഴനി, തെങ്കാശി, കോയമ്പത്തൂര്‍ എന്നിവിടങ്ങളെ ബന്ധിപ്പിച്ചുകൊണ്ട് 18 അന്തര്‍ സംസ്ഥാന സര്‍വീസുകള്‍, ഇതോടൊപ്പം പമ്പയില്‍ നിന്നും വിവിധ ക്ഷേത്രങ്ങളിലേക്ക് സ്പെഷ്യല്‍ സര്‍വീസുകള്‍ എന്നിവ നടത്തിവരുന്നു. അടുത്ത ഒരാഴ്ചയ്ക്കകം ചെന്നൈ, മധുര സര്‍വീസുകളും ആരംഭിക്കുന്നതോടെ വരുമാന നേട്ടം സര്‍വകാല റെക്കോഡില്‍ എത്തുമെന്നാണ് പ്രതീക്ഷ.

 

മുന്‍ വര്‍ഷങ്ങളില്‍ നിന്നും വ്യത്യസ്തമായി കണ്ടക്ടര്‍ ഇല്ലാത്ത സര്‍വീസുകളാണ് നിലയ്ക്കല്‍ നിന്നും പമ്പയിലേക്കും തിരിച്ചും നടത്തുന്നത്. ഇതിനായി നിലയ്ക്കലിലും, പമ്പയിലും 10 പ്രത്യേക കൗണ്ടറുകള്‍ വീതം തയാറാക്കിയിട്ടുണ്ട്. അയ്യപ്പ സ്വാമിമാര്‍ക്ക് കൗണ്ടറില്‍ നിന്നും ടിക്കറ്റ് മുന്‍കൂറായി വാങ്ങി യാത്ര ചെയ്യാം. പ്രായമായവര്‍ക്കും, മുതിര്‍ന്ന പൗരന്മാര്‍ക്കും, ഗ്രൂപ്പ് ടിക്കറ്റുകള്‍ക്കുമായി പ്രത്യേകം കൗണ്ടറുകള്‍ സജ്ജമാക്കിയിട്ടുണ്ട്.

 ചെങ്ങന്നൂര്‍, എരുമേലി, കോട്ടയം, എറണാകുളം, തിരുവനന്തപുരം എന്നീ ജില്ലകളില്‍ നിന്ന് കെ.എസ്.ആര്‍.ടി.സി അധിക സര്‍വീസുകള്‍ നിലയ്ക്കലിലേക്ക് നടത്തുന്നുണ്ട്. നിലയ്ക്കല്‍- പമ്പ എ.സി ബസുകള്‍ക്ക് 80 രൂപയും, മറ്റ് എല്ലാ സര്‍വീസുകള്‍ക്കും 50 രൂപയുമാണ് നിരക്ക്.