ചങ്ങനാശ്ശേരി: മൂവാറ്റുപുഴ എംസി റോഡിൽ ഈസ്റ്റ് മാറാടിയിൽ കാറും ലോറിയും കൂട്ടിയിടിച്ച് ഉണ്ടായ അപകടത്തിൽ ചങ്ങനാശ്ശേരി സ്വദേശികളായ വീട്ടമ്മയുൾപ്പടെ 2 പേർക്ക് ദാരുണാന്ത്യം. ചങ്ങനാശേരി പുതുപ്പറന്പിൽ മുഹമ്മദ് ഇസ്മയിൽ (25), യാത്രക്കാരി ചങ്ങനാശേരി തോപ്പിൽ ശ്യാമള (60) എന്നിവരാണ് അപകടത്തിൽ മരിച്ചത്.
ബുധനാഴ്ച പുലർച്ചെ 3:15 നായിരുന്നു അപകടം. വിദേശത്തു നിന്നെത്തിയ ശ്യാമളയുടെ ഭർത്താവ് ദാമോദരനുമായി നെടുമ്പാശ്ശേരി വിമാനത്താവളത്തിൽനിന്നും വീട്ടിലേക്ക് വരുന്നതിനിടെയാണ് അപകടം ഉണ്ടായത്. മുഹമ്മദ് ഇസ്മയിൽ ആയിരുന്നു കാർ ഓടിച്ചിരുന്നത്. ഇവർ സഞ്ചരിച്ചിരുന്ന കാർ ഈസ്റ്റ് മാറാടിയിൽ വെച്ച് ചരക്ക് ലോറിയുമായി കൂട്ടിയിടിക്കുകയായിരുന്നു. അപകടത്തിൽ വാഹനത്തിന്റെ മുൻഭാഗം പൂർണ്ണമായും തകർന്നു.
അപകടം കണ്ടു ഓടിയെത്തിയവരും പോലീസും ചേർന്ന് വാഹനത്തിലുണ്ടായിരുന്നവരെ ആശുപത്രിയിൽ എത്തിച്ചെങ്കിലും മുഹമ്മദ് ഇസ്മയിലിന്റെയും ശ്യാമളയുടെയും ജീവൻ രക്ഷിക്കാനായില്ല.
അപകടത്തിൽ പരിക്കേറ്റ ശ്യാമളയുടെ ഭർത്താവ് ദാമോദരൻ (65), ശ്യാമളയുടെ സഹോദരൻ അനിൽകുമാർ എന്നിവരെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഡ്രൈവർ ഉറങ്ങിപ്പോയതാകാം അപകട കാരണമെന്നാണ് പ്രാഥമിക നിഗമനം.
